Trafiku i armëve nga Kosova në Shqipëri po konsolidohet si një linjë operimesh e grupeve kriminale shqiptare. Një operacion i fundit ka sjellë në arrestimin e 27-vjeçarit Dugagjin Berisha, i cili u ndalua pas shitjes së simuluar të dy pistoletave. Ai kishte transportuar 10 pistoleta të tjera nga Kosova drejt Freskut në Tiranë, të cilat u gjetën të fshehura në automjetin e tij dhe u sekuestruan nga policia.
Pas kontrollit të armëve, u konstatua se ato nuk ishin marka origjinale Glock, por imitime, çka ka shtyrë autoritetet të intensifikojnë hetimet dhe shkëmbimet e informacionit me palën kosovare për të identifikuar prodhuesin e këtyre armëve. Hetimi i mëtejshëm po fokuson në rolin e 27-vjeçarit, i cili dyshohet se ka vepruar vetëm si transportues. Aktualisht po verifikohen të dhënat për të identifikuar të gjithë zinxhirin e trafikantëve, përfshirë dërguesit në Kosovë dhe pritësit në Shqipëri, të cilët dyshohet se ndodhen në zonën e Freskut.
Policia e Shtetit ka evidentuar vitin e kaluar 32 raste të trafikimit të armëve në Shqipëri, shumica e tyre nga Kosova. Ky fenomen ka krijuar shqetësime të mëdha për sigurinë publike dhe ka përshpejtuar përpjekjet e forcave të rendit për të marrë masa më të ashpra kundër grupeve kriminale që operojnë në këtë sektor. Të dhënat që dalin nga hetimet po ndihmojnë në hartimin e strategjive për të frenuar këtë aktivitet të paligjshëm dhe për të mbajtur nën kontroll fluksin e armëve që mund të dëmtojnë sigurinë e qytetarëve.
