Ukraina u godit në orët e fundit nga sulme masive ruse, që përfshinin deri në 400 dronë dhe 40 raketa, sipas presidentit Volodymyr Zelensky. Ai dha këto të dhëna në një mesazh në X. Dëmet më të mëdha u regjistruan në rajonet e Volyn, Ivano-Frankivsk, Lviv dhe Rivne, ku një ndërtesë banimi u dëmtua. Në Ladyzhyn, rajoni i Vinnytsia, dronët sulmuan një ndërtesë administrative të një instituti bujqësor. Presidenti po ashtu raportoi sulme në rajonet e Kievit dhe Kharkiv, duke nënvizuar se operacionet e mbrojtjes ajrore vazhdojnë në disa zona të vendit.
Zelensky theksoi se Rusia ka mundësinë të zgjidhë krizën përmes diplomacisë, por përzgjodhi të kryejë sulme të reja. Ai bëri thirrje për një përgjigje nga ata që mbështesin negociatat trepalëshe dhe kërkoi furnizime shtesë me raketa për sistemet anti-ajrore si Patriot, NASAM dhe të tjera. Presidenti nënvizoi rëndësinë e këtyre dërgesave duke theksuar se ato do të ndihmojnë Ukrainën të përballojë dimrin.
Në përmbyllje, Zelensky shprehu falënderimet për partnerët ndërkombëtarë për mbështetje e vazhdueshme, duke vlerësuar se kjo ndihmë “po ndihmon vërtet” vendin në këto momente të vështira.
