Autoriteti Rrugor Shqiptar ka përditësuar situatën e qarkullimit në Qafë Thore, duke njoftuar se rruga është e hapur, ndërsa vazhdojnë punimet për pastrimin e borës. Në këtë zonë po bien reshje të konsiderueshme bore, prandaj autoritetet janë në alert për rrezikun e mundshëm nga ortekët.
Më tej, autoriteti ka këshilluar shoferët që kanë nevojë të lëvizin të bëjnë këtë gjatë ditës për të shmangur rrezikun e lëvizjeve në orët e vona të natës, kur situata mund të përkeqësohet. Zhvillimet e motit sugjerojnë se reshjet e borës do të vazhdojnë, duke rritur kështu mundësinë e riaktivizimit të ortekëve.
Për t’u përballur me këtë situatë, kontraktori i mirëmbajtjes është aktiv në terren me mjete dhe punëtorë, të gatshëm për të reaguar ndaj çdo emergjence që mund të ndodhë.
