Air Force One ka aterrizuar në Milano, duke sjellë zëvendëspresidentin e SHBA-së, J.D. Vance, dhe Sekretarin e Shtetit, Marco Rubio. Të dy politikanët do të marrin pjesë në ceremoninë e hapjes së Lojërave Olimpike Dimërore Milano-Cortina, që do të zhvillohet nesër në stadiumin San Siro.
Ceremonia pritet të jetë një ngjarje spektakolare, me 1,340 sportistë dhe performanca nga artistë të njohur si Andrea Bocelli, Mariah Carey dhe Laura Pausini. Sipas mediave italiane, do të jenë të pranishëm gjithashtu figura të rëndësishme ndërkombëtare, përfshirë Sekretarin e Përgjithshëm të Kombeve të Bashkuara, Antonio Guterres, dhe presidentin gjerman, Frank-Walter Steinmeier, si dhe trembëdhjetë presidentë dhe shtatë kryeministra europianë.
Mbërritja e presidentit francez, Emmanuel Macron, dhe e princit britanik William me bashkëshorten e tij, Kate, është gjithashtu e pritur, gjithashtu Princi Albert i Monakos dhe mbretërit e Suedisë, Norvegjisë dhe Holandës kanë konfirmuar pjesëmarrjen.
Masat e sigurisë janë jashtëzakonisht të larta, me mbi 6,000 forca të rendit, duke përfshirë policë, karabinierë, zjarrfikës dhe snajperë elitarë, për të siguruar një atmosferë të qetë dhe të sigurt për të gjithë pjesëmarrësit dhe publikun.
Pas mbërritjes në Milano, J.D. Vance dhe Marco Rubio do të takojnë sportistët e ekipit amerikan përpara fillimit të Lojërave. Ky aktivitet shënon një tjetër moment të rëndësishëm për zhvillimin e marrëdhënieve ndërkombëtare dhe për promovimin e sportit në nivel global.
