Dy shtetas shqiptarë, Denis Puka dhe Erisjan Laska, janë dënuar me nga 4 vjet e 8 muaj burg nga gjykata britanike për kryerjen e një sërë grabitjesh të organizuara në Angli. Të pandehurit ishin shpallur fajtorë për një seri grabitjesh dhe tentativa të tjera që ndodhen gjatë tre netëve në qershor të vitit të kaluar, duke përfshirë një atentat në shtëpinë e ish-futbollistit të Aston Villa, Scott Hogan.
Gjyqtarët e Gjykatës së Kurorës në Chester theksuan se veprimtaria e dy të akuzuarve ishte e mirëorganizuar. Ata kishin rezervuar një apartament në Airbnb si bazë operimi dhe përdornin një automjet Seat Leon me targa të falsifikuara për të shmangur identifikimin. Gjyqtari Steven Everett e karakterizoi skemën e tyre si “të sofistikuar dhe të planifikuar mirë”, ndërsa theksoi se ata kishin përdorur mjete për thyerje dhe ishin të maskuar, duke treguar nivelin e lartë të përgatitjes.
Gjatë tentativës për të grabitur shtëpinë e Hoganit, në të cilën ndodheshin bashkëshortja e tij shtatzënë dhe vajza e tyre e vogël, autorët u përpoqën të hynin nëpërmjet oborrit. Futbollisti u shqetësua nga drita e një elektrik dore dhe u përpoq të ndiqte grabitësit, por ata arratë nga vendi i ngjarjes.
Përveç shtëpisë së Hoganit, Puka dhe Laska sulmuan gjithashtu prona në Blackpool, Grappenhall, Knutsford dhe Northwich. Në një rast, ata hynë në një shtëpi pa vjedhur asgjë, por në një vilë luksoze në Northwich, arritën të grabisnin një orë Breitling dhe një Rolex, vlera e të cilave arrinte në 9 mijë paund.
Pas një jave hetimesh, dy shqiptarët u arrestuan pasi automjeti i tyre u gjet në një kompleks banimi. Policët gjetën brenda tij telefona, rroba të përdorura gjatë grabitjeve dhe mjete të tjera. Puka dhe Laska pranuan fajësinë për akuzat e ngritura ndaj tyre dhe do të vuajnë dënimin e vendosur nga autoritetet britanike.
