Një i dyshuar për grabitje është paraqitur në gjykatë pas akuzave për më shumë se 30 vepra penale në të gjithë Anglinë. Sipas Kent Online, nga këto vepra, 14 dyshohet të jenë kryer në Kent, përkatësisht në Sevenoaks, Tonbridge dhe Ashford. Gledis Uka, 29 vjeç, që nuk ka një adresë të saktë, u akuzua më 31 janar me 31 akuza për vjedhje me thyerje dhe dy akuza për tentativë vjedhjeje me thyerje.
Uka u paraqit në Gjykatën e Magjistraturës në Sevenoaks, ku u mbajt në paraburgim. Sipas hetimeve, shumë nga pronat e përfshira kishin dritare ose derë xhami të thyera, nga ku burri i maskuar kishte hyrë për të vjedhur bizhuteri dhe para. Ai u arrestua në Essex nga oficerë të Policisë së Kentit të premten.
Së shpejti, Uka do të paraqitet sërish në Gjykatën e Kurorës në Maidstone më 2 mars. Ndërkohë, veprat e tjera të dyshuara nga ai përfshijnë prona në zona të ndryshme si Berkshire, Bristol, Buckinghamshire, Essex, Suffolk dhe Surrey.
