Me hyrjen në fuqi të “Ligjeve të Mrdicit”, autoritetet serbe po ndërmarrin masa që, sipas ekspertëve dhe opozitës, shihen si një paralizim i prokurorisë dhe një rrëshqitje drejt diktaturës. Pas kontrollit të policisë dhe shërbimeve të sigurisë, pushteti ka filluar të nënshtrojë edhe gjyqësorin përmes ndryshimeve ligjore që synojnë një kontroll të plotë partiak mbi prokuroritë.
Një nga elementët kyç të këtyre ndryshimeve është Prokuroria për Krimin e Organizuar (TOK), e cila, sipas vlerësimeve, pritet të humbasë kapacitetin e saj real të veprimit. Kjo do të arrihet duke kthyer prokurorët e deleguar në institucionet e tyre fillestare, duke e zbrazur kështu TOK-un, ndërsa, në të njëjtën kohë, Prokurorisë së Lartë në Beograd i zgjerohet juridiksioni dhe struktura nën udhëheqjen e një figure të afërt me pushtetin.
Këto ndryshime ndodhin në një kontekst ku një numër gjithnjë e më i madh i figurave të lidhura me regjimin janë përballur me hetime, duke ushtruar dyshime mbi qëllimin e tyre për të bllokuar drejtësinë. Bashkimi Evropian e ka cilësuar këtë situatë si një hap të rëndësishëm prapa në procesin e integrimit të Serbisë dhe disa politikanë evropianë kanë propozuar pezullimin e negociatave.
Kryetari i Gjykatës Kushtetuese, Vladan Petrov, ka deklaruar gjithashtu se gjyqtarët kritikë ndaj qeverisë duhet të shkarkohen, çka ka përkeqësuar situatën. Analisti Dragomir Angjelkovic thekson se frika në shoqëri po zbehet, duke sugjeruar se pushteti nuk po përpiqet më të ruajë as fasadën demokratike.
Përqendrimi ekstrem i pushtetit, kontrolli i institucioneve dhe injorimi i vendimeve gjyqësore kanë ngritur pyetje mbi kuptimin e zgjedhjeve. Në këto rrethana, mbetet e paqartë se cilat mjete ligjore i mbeten qytetarëve për t’u mbrojtur nga arbitrariteti i pushtetit.
