Punimet në aksin rrugor “Librazhd-Korçë” do të shkaktojnë bllokimin e qarkullimit të automjeteve në fshatin Dragostunjë nga 3 deri më 5 shkurt 2026, konkretisht gjatë orëve 22:00 deri në 05:00. Gjatë këtyre orëve, aksi rrugor do të jetë i pakalueshëm, veçanërisht për mjetet e tonazhit të rëndë.
Autoritetet përkatëse kanë njoftuar pikat e kalimit kufitar për të informuar drejtuesit e mjeteve mbi këtë bllokim të përkohshëm. Gjatë periudhës së bllokimit, do të lejohen të qarkullojnë vetëm autoambulancat, mjetet zjarrfikëse dhe ato të Policisë.
Mjetet e vogla do të kenë një alternative kalimi përmes aksit “Maliq – Lozhan – Moglicë – Gramsh”, e cila ofron lidhje drejt Tiranës dhe anasjelltas. Shërbimet e Policisë do të jenë të pranishme në terren për të menaxhuar situatën dhe për të siguruar rendin dhe sigurinë në rrugë.
Policia Rrugore e Elbasanit apelon për mirëkuptim nga drejtuesit e mjeteve dhe thekson rëndësinë e respektimit të sinjalistikës dhe udhëzimeve të Policisë. Ajo nxit qytetarët të shmangin lëvizjet e panevojshme gjatë periudhës së bllokimit.
Në rast nevojash ose për të raportuar shkelje të rregullave të qarkullimit që mund të shkaktojnë ngadalësim ose bllokim të lëvizjes, qytetarët mund të telefonojnë në numrin pa pagesë 112 ose të kontaktojnë shërbimet e Policisë në detyrë.
