Presidenti i SHBA-së, Donald Trump, ka njoftuar një ulje të konsiderueshme të tarifave doganore për produktet indiane, duke theksuar se kryeministri indian Narendra Modi ka pranuar të ndalojë blerjen e naftës ruse. Tarifave do t’u ulen menjëherë në 18%, nga 50% të mëparshme, dhe do të hiqet edhe një tarifë shtesë prej 25% që ishte vendosur për të frenuar importet indiane të naftës nga Rusia.
Në një postim në rrjetet sociale, Trump theksoi se kishte biseduar me Modin, i cili pranoi të zëvendësojë naftën ruse me importe nga SHBA dhe Venezuela. Megjithatë, Modi nuk përmendi konkretisht ndalimin e blerjes së naftës ruse gjatë bisedës. India aktualisht importon rreth 1.5 milion fuçi naftë ruse në ditë, që përbën mbi një të tretën e totalit të importeve të saj. Rusia është një furnizues kyç për ekonominë indiane, për shkak të çmimeve më të ulëta.
Ekspertët vlerësojnë se zëvendësimi total i naftës ruse do të përballet me sfida, pasi infrastruktura energjetike e Venezuelës është e amortizuar dhe kërkon investime të mëdha për rikthimin në kapacitetet e mëparshme. India, gjithashtu, blen më shumë naftë nga Rusia sesa prodhon aktualisht Venezuela.
Rënia e çmimeve globale të naftës ka zvogëluar diferencën midis naftës së sanksionuar dhe asaj jo të sanksionuar. Ky kontekst e bën më të lehtë për Indinë të ndryshojë burimet e furnizimit, duke marrë parasysh ndikimin e tarifave amerikane ndaj eksportuesve indianë.
Presidenti Trump pohon se India ka rënë dakord të heqë tarifat për mallrat amerikane dhe të eliminojë disa barrierat jotarifore. Ai gjithashtu përmendi një paketë investimesh prej 500 miliardë dollarësh në sektorë të ndryshëm, duke përfshirë energjinë dhe teknologjinë.
Gjatë vitit 2025, Shtetet e Bashkuara importuan mallra nga India me një vlerë prej 95.5 miliardë dollarësh, ndërsa eksportet amerikane drejt Indisë ishin rreth 42 miliardë dollarë. Marrëveshja e re pritet të prekë sektorët e elektronikës, farmaceutikës, tekstileve dhe bizhuterive. Megjithatë, analistët shprehin skeptikizëm mbi zbatimin e plotë të marrëveshjes, duke theksuar se termat ende nuk janë të qarta dhe se India mund të vazhdojë të blejë naftë nga Rusia.
