Problemet me qarkullimin vazhdojnë në aksin Librazhd-Qafë Thanë, pranë fshatit Dragostunjë. Rruga aktualisht është e hapur vetëm për një korsi e gjysmë, për shkak të një gurosh të madh që ende nuk është zhvendosur. Korrespondentja e Top Channel, Bruna Kërçyku, raportoi se kjo rrugë ishte e bllokuar për 8 orë ditën e djeshme, dhe mjetet që mund të kalojnë janë vetëm ato të vogla, ndërsa mjetet e tonazhit të rëndë nuk kanë mundësi kalimi.
Autoritetet po i këshillojnë shoferët të lëvizin me kujdes në këtë aks. Ekipet e punës punuan për orë të tëra për të shembur faqen e malit për të reduktuar rrezikshmërinë pas hapjes së rrugës. Gjatë kohës që ata mbetën të bllokuar, gra, fëmijë dhe të moshuar ishin të detyruar të prisnin.
Policia gjithashtu rekomandoi që drejtuesit të përdorin një itinerar alternativ: aksin Maliq-Lozhan-Moglicë-Gramsh-Elbasan për të udhëtuar drejt Tiranës. Bllokimi i rrugës ndodhi në një moment kur qindra pushues po ktheheshin nga juglindja, duke e bërë situatën edhe më të ndërlikuar.
