Real Madridi arriti një fitore të rëndësishme ndaj Rayo Vallecanos në “Santiago Bernabéu”, falë një penalltie të shndërruar në gol nga Kylian Mbappé në minutën e 100-të. Ndeshja, e cila kishte tension dhe pakënaqësi nga ana e tifozëve, tregoi sërish probleme në lojën e vendasve.
Vinicius Jr. e çoi Realin në avantazh me një gol spektakolar në pjesën e parë, por pas pushimit, Rayo reagoi dhe arriti të barazonte me golin e De Frutos. Vizitorët patën mundësi për të përmbysur ndeshjen, por portieri Courtois shfaqi një paraqitje të shkëlqyer, duke i ndaluar ata.
Kur ndeshja dukej se do të përfundonte me barazim, Real Madridi përfitoi një penallti në sekondat e fundit. Mbappé e shfrytëzoi këtë mundësi për t’i dhënë tri pikë të arta ekipit të tij, duke mbajtur “Los Blancos” një pikë prapa Barcelonës në renditje.
