Don Lemon, ish-prezantues i CNN-it, u arrestua në mbrëmje të enjtes për pjesëmarrje në një protestë që ndërpreu një shërbesë kishtare në Minesota, më 18 janar. Arrestimi u realizua nga agjentët federalë në Los Angeles, ku Lemon ndodhej për mbulimin e ceremonisë së çmimeve Grammy. Avokati i tij, Abbe Lowell, theksoi se arrestimi përbën një sulm ndaj lirisë së medias, duke pohuar se Lemon ishte duke ushtruar aktivitetin e tij gazetaresk.
Protesta e ndodhur brenda një kishe u shoqërua me ndërprerje të shërbimit fetar, dhe më herët tre persona ishin arrestuar për komplot dhe ndërhyrje në të drejtat civile. Lemon kishte dokumentuar ngjarjen dhe kishte intervistuar pjesëmarrësit, duke publikuar pamje në kanalin e tij online.
Derisa Departamenti amerikan i Drejtësisë nuk ka dhënë një reagim zyrtar në lidhje me arrestimin, mediat amerikane raportojnë se Lemon ndodhet aktualisht në paraburgim. Ky arrestim erdhi pas tensioneve midis tij dhe administratës Trump, e cila ka kritikuar ashpër gazetarin në të kaluarën.
Avokati i Lemon ka shpallur se do të ndjekin çështjen në gjykatë dhe se klienti i tij do t’i kundërshtojë akuzat “me forcë dhe deri në fund.”
