Një aksident fatal në Rumani ka tronditur Greqinë, ku një furgon me tifozë të ekipit PAOK të Selanikut u përfshi në një përplasje të rëndë. Tifozët, të moshës 25 deri 30 vjeçare, udhëtonin drejt Francës për ndeshjen në Europa League kundër Lionit. Bilanci tragjik i këtij aksidenti është 7 të vdekur dhe 3 të plagosur rëndë. Viktimat ishin të gjithë me nënshtetësi greke, pesë prej tyre nga Aleksandria e Imathias, dy nga Katerini dhe tre nga Selaniku. Raportohet se një nga viktimat mund të ketë origjinë shqiptare nga Korça.
Sipas autoriteteve rumune, aksidenti ndodhi kur furgoni përpiqej të parakalonte një kamion-cisternë. Pas përplasjeve të shumta me mjete të tjera, furgoni përfundoi në krahun e kundërt të rrugës. Gjashtë nga viktimat humbën jetën në vend, ndërsa një tjetër ndërronte jetë gjatë transportit në spital. Njëri nga të plagosurit ndodhet në gjendje kritike, ndërsa një tjetër ka dëmtime më të lehta.
Helikopterët e emergjencës nuk mundën të intervenonin për shkak të kushteve të këqija atmosferike dhe të plagosurit u dërguan në spitalin e qytetit Lugoj. Ministria e Jashtme e Greqisë dhe ambasada greke në Bukuresht po mbajnë kontakte me autoritetet rumune për identifikimin e viktimave dhe për mbështetje ndaj familjarëve të tij. Klubi PAOK ka shpallur zi për këtë ngjarje dhe ka njoftuar se do të mbulojë shpenzimet për kthimin e trupave dhe ndihmën për të plagosurit.
Megjithatë, kërkesa për anulimin e ndeshjes nga federata europiane e futbollit nuk është pranuar. Ngjarja ka tërhequr vëmendjen e mediave europiane, duke e bërë një nga incidentet më tronditëse të këtij vitit në sportin e futbollit.
