Koreja e Veriut ka kryer një tjetër test raketor, duke lëshuar të paktën një predhë në Detin e Japonisë, sipas raportimeve nga ushtria e Koresë së Jugut. Nga ana e saj, Japonia njoftoi se kishte lëshuar dy raketa balistike. Roja bregdetare dhe Ministria e Mbrojtjes japoneze konfirmuan se raketat të cilat u lëshuan nga Koreja e Veriut duket se përfunduan fluturimin e tyre pa specifikuar se ku ranë, ndërsa agjencia Jiji Press raportoi se ato ranë jashtë Zonës Ekonomike Ekskluzive të Japonisë.
Ky është testi i dytë i realizuar nga Pheniani që nga fillimi i vitit, pas një serie të lëshimeve raketore më 4 janar. Kjo ndodhi pak para se Presidenti i Koresë së Jugut, Lee Jae-myung, të nisej për një samit në Kinë dhe sapo SHBA-të arrestuan Presidentin Venezuelan, Nicolas Maduro. Testi i fundit erdhi gjithashtu pas vizitës në Seul të Elbridge Colby, zyrtarit të lartë të Pentagonit, i cili e cilësoi Korenë e Jugut si një “aleat model”.
Analistët vlerësojnë se Koreja e Veriut ka rritur aktivitetin e saj raketor në vitet e fundit me qëllim përmirësimin e kapaciteteve të saj për të kryer sulme precize. Këto teste shihen si një mënyrë për të sfiduar Shtetet e Bashkuara dhe Korenë e Jugut dhe gjithashtu për të provuar armët për t’i eksportuar ato potencialisht në Rusi.
Ndërkohë, Pheniani po përgatitet për mbajtjen e kongresit të Partisë së Punëtorëve të Koresë, i pari në pesë vjet. Para këtij eventi të rëndësishëm, udhëheqësi Kim Jong-un ka kërkuar “zgjerimin” dhe modernizimin e prodhimit të raketave të vendit, duke theksuar angazhimin e tij për zhvillimin e kapaciteteve kërcënuese të Koreas së Veriut.
