Ish-kandidati presidencial i El Salvadorit, Norman Quijano, u ekstradua nga Shtetet e Bashkuara dhe mbërriti në vendin e tij për të nisur dënimin prej 13 vitesh burg për dhënie ryshfeti bandave. Dënimi u shpall në prill 2024, ku Quijano, i akuzuar për blerjen e votave me 100,000 dollarë, u gjykua në mungesë.
Në kohën e akuzës, ai ishte kryebashkiak i San Salvadorit dhe kishte kandiduar pa sukses në zgjedhjet presidenciale të vitit 2014 si përfaqësues i Aleancës Nacionaliste Demokratike (ARENA). Gjyqi u zhvillua pas humbjes së imunitetit të tij ligjor në vitin 2021, kur u akuzua për pagesa prej 50,000 dollarësh për bandën Mara Salvatrucha (MS-13) dhe 25,000 dollarësh për dy fraksione të tjerë të Barrio 18. Të dy bandat janë shpallur si organizata “terroriste” nga qeveria e SHBA-së.
Quijano u arrestua në mars të vitit 2025 në SHBA, ku ishte arratisur. Prokuroria e El Salvadorit ndau një video të tij duke u transportuar me avion dhe duke u prangosur nga policia pas mbërritjes për të marrë njoftimin e dënimit. Presidenti Nayib Bukele, në një postim në X, theksoi se ky rast shërben si një mesazh për ata që përpiqen të shmangin drejtësinë.
Ka ekzistuar shqetësimi mbi akuzat për marrëveshje të dyshuara mes anëtarëve të qeverisë së Bukeles dhe bandave, ndonëse presidenti i mohon kategorikisht këto akuza. Që prej marsit të vitit 2022, Bukele ka iniciuar një “luftë” kundër bandave, duke shpallur gjendje të jashtëzakonshme që lejon arrestime pa urdhër-arreste. Më shumë se 90,000 persona janë arrestuar në këtë periudhë, shkaku i të cilëve janë gjithashtu raportet për shkelje të të drejtave të njeriut dhe vdekje nëpër burgje.
Sipas organizatës Socorro Jurídico Humanitario, mbi 470 persona kanë humbur jetën në burgjet e vendit që prej fillimit të kësaj gjendjeje. Kjo luftë ka rezultuar në një rënie të krimit në nivele historike, megjithatë, kritikat për r arrestime arbitrare dhe tortura vazhdojnë.
