Mesditën e të hënës, kompanitë transportuese serbe filluan një protestë në pikat kufitare, duke bllokuar qarkullimin e mallrave. Protesta u organizua në Merdares dhe të gjitha vendkalimet në Serbi si një reagim ndaj sistemit të ri të kontrollit të Bashkimit Evropian për hyrje-daljet, i njohur si rregulli “90/180 ditë”. Sipas kompanive, ky vendim rrezikon që ata të mbesin pa shoferë, pasi ata ndihen të trajtuar si emigrantë ilegalë.
Pronari i kompanisë Daka Doljeva, Lubisha Najdanoviç, shprehu shqetësimin se një numër i madh kamionësh është i bllokuar, dhe të ardhmen e kompanive e sheh të rrezikuar. Ai tha se protestat do të vazhdojnë deri në shtatë ditë, në pritje të një takimi me përfaqësuesit e BE-së për të biseduar mbi kërkesat e transportuesve. Bllokimi ndikon vetëm në kalimin e mallrave, ndërsa qarkullimi i veturave vazhdon normalisht.
Protesta po ashtu përfshiu bllokimin e pikave kufitare me Maqedoninë e Veriut dhe Malin e Zi, pas reagimeve nga transportuesit e këtyre vendeve. Ndërkohë, përderisa Kosova nuk është pjesë e protestës, bllokimi i qarkullimit të mallrave pritet të ketë pasoja për importin dhe eksportin e saj. Dhoma e Tregtisë dhe Industrisë në Kosovë shprehu shqetësim për ndikimin negativ që protestat e fqinjëve po ushtrojnë në kompanitë vendase, të cilat po hasin vështirësi në realizimin e transaksioneve tregtare.
Kosova importon mallra me vlerë rreth 7 miliardë euro në vit, duke përfshirë rreth 20 milionë euro nga Serbia dhe Maqedonia e Veriut, dhe me bllokimin e këtyre rrugëve, situata bëhet më e komplikuar. Në këtë kontekst, transportuesit nga Serbia, Maqedonia e Veriut, Mali i Zi dhe Bosnja e Hercegovina po protestojnë kundër rregullit “90/180 ditë”, që i kufizon ata në qëndrim në zonën Schengen. Aktualisht, rruga e vetme për kalimin e mallrave për Kosovën është përmes Shqipërisë, vend që nuk është bashkuar në protestë.
