Pas tre vitesh, mesfushori Marco Verratti rishfaqet në horizontin e kombëtares italiane. Ai mungon në ndeshjet ndërkombëtare që nga viti 2023, por ka mundësi të grumbullohet për playoff-et e Botërorit të marsit. Kjo është një mundësi e re që po shqyrtohet nga trajneri Gennaro Gattuso, i cili së fundmi ka vizituar Arabinë Saudite dhe Katarin, ku Verratti aktivizohet me skuadrën Al-Duhail.
Sipas La Gazzetta Dello Sport, Gattuso po kërkon një organizator loje, dhe 33-vjeçari, i cili nuk ka veshur fanellën e Italisë për tri vjet, ka lënë të kuptohet se është i gatshëm të rikthehet. Ai e ka shprehur hapur dëshirën për t’u bashkuar me kombëtaren, dhe pritet që vendimi përfundimtar të merret në javët e ardhshme, pas vlerësimit të lojtarëve të tjerë.
Gattuso ka intensifikuar aktivitetet për të mbajtur lidhje me lojtarët, duke udhëtuar nëpër Itali dhe jashtë saj. Pas Katarit, ai planifikon të vizitojë Anglinë për të kontaktuar me atje lojtarë si Gianluigi Donnarumma, Calafiori, Tonali dhe Chiesa. Kjo strategji vjen si pasojë e pamundësisë për të organizuar një grumbullim të plotë në Coverciano, për shkak të ngjeshjes së kalendarit të klubeve.
Rikthimi i Verratti-t mund të jetë një ndihmë e madhe për Italinë, e cila po kërkon të rinovojë skuadrën e saj për sfidat e ardhshme. Mbetet për t’u parë nëse vendimi i Gattuso do të përfshijë emrin e tij në listë, duke pasur parasysh se trajneri përpiqet të përzgjedh lojtarët më të duhur që i përkojnë filozofisë së tij të lojës.
