Një ngjarje e rëndë ka tronditur futbollin shqiptar mëngjesin e kësaj të shtune me ndarjen nga jeta të vajzës së mitur të futbollistit të Tiranës, Freddy Alvarez. Sipas informacionit nga gazetarja e Top Channel, Dorjana Bezat, vajza, e cila kishte rreth 5-6 vjeç, humbi jetën pas një aksidenti brenda shtëpisë së futbollistit. Ajo u rrëzua në ambientet e banesës dhe plagët e marra rezultuan fatale.
Ky lajm tronditës ka sjellë solidaritet të gjerë nga klubi i Tiranës dhe nga klube të tjera të Superiores, të cilat shprehën ngushëllimet për Alvarez dhe familjen e tij në këtë moment të vështirë. Për të nderuar kujtimin e vajzës, Federata Shqiptare e Futbollit (FSHF) vendosi të shtyjë takimin mes Tiranës dhe Flamurtarit, i cili ishte planifikuar për këtë të shtunë në orën 13:30, duke e kaluar atë për nesër në të njëjtën orë.
