Dy vëllezër shqiptarë, Blerim Buci, 41 vjeç, dhe Besmir Buci, 32 vjeç, janë arrestuar nga policia greke si autorë të dyshuar të shpërthimit me eksploziv në diskotekën “Jacky.O” në Athinë, ndodhur më 7 tetor 2025. Të dy vëllezërit kanë precedentë penalë në Greqi dhe ishin nën hetim për krime të ndryshme, duke përfshirë grabitjen dhe shkeljen e ligjeve mbi armët.
Ngjarja ndodhi kur Besmir Buci parkoi automjetin pranë diskotekës dhe, pas një veprimi të shpejtë, aktivizoi një pajisje shpërthyese që kishte vendosur. Ai më pas u largua nga vendi me ndihmën e vëllait të tij, Blerimit, që e priste në automjet. Autoritetet zbuluan se automjeti ishte siguruar për ta nga një bashkëpunëtor grek, 44 vjeçar.
Gjatë operacionit të ndalimit, policia gjeti dhe sekuestroi një sërë prove, përfshirë një thikë palosëse, tetë telefona celularë, një pajisje telekomandimi, veshje të përdorura gjatë veprës kriminale dhe automjetin e përdorur. Një nga vëllazërit të arrestuar pranoi se një çift i kishte paguar 5,000 euro për të vendosur bombën si një “mesazh paralajmërues” ndaj pronarit të diskotekës, i cili kishte refuzuar t’i nënshtrohej shantazhit.
Gjatë ndalimit, Blerim Buci tentoi të fshihej në një zonë të hapur dhe kur policia iu afrua, ai ofroi rezistencë fizike. Megjithatë, forcat e rendit arritën ta ndalonin. Të dy vëllezërit janë të njohur për histori kriminale që përfshijnë vjedhje, grabitje dhe shkelje të ligjeve të drogës, dhe janë dërguar në autoritetet kompetente për ndjekje penale.
