Qeveria shqiptare miratoi marrëveshjen për aderimin në Bordin e Paqes për Gazën, me ratifikimin e pritur nga Kuvendi nesër. Dokumenti zyrtar evidenton se marrëveshja është miratuar nga Këshilli i Ministrave më 21 janar 2026 dhe ka si qëllim që Shqipëria, nën udhëheqjen e Kryeministrit Edi Rama, të bëhet anëtare e Kartës themeluese të Bordit.
Bordi i Paqes do të krijohet si një organizatë ndërkombëtare, me misionin e promovimit të stabilitetit dhe sigurimin e paqes në territore të prekura nga konflikti. Aktivitetet e tij do të udhëhiqen nga norma të së drejtës ndërkombëtare.
Pjesëmarrja e Shqipërisë në këtë Bordi është e konsideruar si një hap i rëndësishëm për politikën e jashtme të vendit, duke e pozicionuar si një faktor stabiliteti veçanërisht në konflikte shumëvjeçare, përfshirë ato në Lindjen e Mesme. Shqipëria do të ketë statusin e anëtarit themelues, duke e siguruar një rol aktiv në vendimmarrje dhe formësimin e vizionit të Bordit.
Bordi i Paqes do të drejtohet nga një Kryetar dhe do të ketë dy struktura vendimmarrëse: Bordin e Shteteve Anëtare dhe Bordin Ekzekutiv. Vendimet do të merren me shumicë votash, por kërkojnë konfirmimin e Kryetarit, i cili ka të drejtën e vetos.
Anëtarësimi i shteteve do të jetë me ftesë dhe mandati do të jetë trevjeçar, përveç atyre që kontribuojnë mbi 1 miliard dollarë brenda vitit të parë. Karta e Bordit garanton ruajtjen e sovranitetit të shteteve anëtare, duke përcaktuar se nuk ka juridiksion brenda territorit të tyre.
Financimi i Bordit do të bëhet përmes kontributeve vullnetare çdo vit. Organizata dhe personeli i saj do të kenë imunitete të nevojshme për funksionimin e saj. Në këtë fazë, miratimi i projektligjit nuk do të sjellë kosto shtesë për buxhetin e shtetit, por kontributet financiare do të planifikohen për periudhën 2027-2029.
Ministria për Evropën dhe Punët e Jashtme do të ngarkohet për zbatimin e marrëveshjes, e cila është iniciativë e Shteteve të Bashkuara dhe mbështetet nga Këshilli i Sigurimit të OKB-së.
