Parlamenti Europian ka mbështetur fuqishëm të drejtat e pasagjerëve ajrorë, duke refuzuar propozimet e Këshillit dhe Komisionit Europian për reformimin e rregullave në këtë sektor. Në seancën plenare në Strasburg, një shumicë e madhe prej 632 eurodeputetësh e hodhi poshtë nismën e Këshillit, me vetëm 15 vota pro dhe 9 abstenime. Sipas Parlamentit, ndryshimet do të dobësonin ndjeshëm mbrojtjen e konsumatorëve.
Liberalizimi i tregut ajror të BE-së në vitin 1997 ka sjellë rritje të itinerareve dhe ulje të çmimeve, por gjithashtu ka shkaktuar rritje të vonesave dhe humbje bagazhesh. Linjat ajrore, përmes shoqatës “Airlines for Europe” (A4E), kanë kërkuar ndryshime në rregullat aktuale për shkak të kostove operative në rritje.
Sipas rregullave të miratuara në vitin 2004, pasagjerët kanë të drejtë të marrin kompensim deri në 600 euro për fluturimet e vonuara mbi tre orë. Këshilli i BE-së propozoi rritjen e kësaj vonese deri në 4, 6 ose 12 orë, duke përjashtuar kështu shumicën e pasagjerëve nga kompensimi, një propozim që Parlamenti e kundërshtoi me forcë.
Po ashtu, Parlamenti kërkon që çdo pasagjer të ketë të drejtë për një send personal dhe një bagazh dore falas, duke refuzuar tarifimin e bagazhit të dorës. Një tjetër aspekt i rëndësishëm është mbrojtja e grupeve vulnerabël, të cilat kërkojnë vende falas pranë shoqëruesve dhe procedura më të thjeshta për kompensim.
Andrei Novakov, raportues i Parlamentit Europian, nënvizoi se nuk do të ketë kompromise në lidhje me të drejtat e pasagjerëve, duke shprehur se ka mënyra të tjera për të ndihmuar linjat ajrore, si ulja e taksave aeroportuale, por pa cënuar kompensimin.
Pas këtij refuzimi, negociatat ndërmjet Parlamentit Europian, Këshillit të BE-së dhe Komisionit Europian pritet të rifillojnë në një raund të ri diskutimesh, kjo për të gjetur një zgjidhje të pranueshme për të gjitha palët.
