Përplasja publike mes Ryanair dhe Elon Musk ka marrë një kthesë të re, duke u karakterizuar nga tonet e forta dhe sarkazmën në rrjetet sociale. Michael O’Leary, CEO i Ryanair, i është përgjigjur Musk duke pranuar sfidën e tij dhe duke ofruar një biletë vajtje pa kthim për 16.99 euro, duke e cilësuar këtë ofertë si një “promocion për idiotët”.
Ryanair ka njoftuar lançimin e fushatës “Great Idiots Seat Sale”, e dedikuar në veçanti për Musk. Oferta përfshin 100 mijë vende për fluturime njëdrejtimëshe me çmim 16.99 euro dhe është shoqëruar me komente sarkastike që i drejtohen “të gjithë idiotëve të X”.
O’Leary do të flasë në një konferencë për shtyp në Dublin për të komentuar sulmet e Musk ndaj kompanisë. Ai është cituar duke thënë se Musk di më pak për rregullat e pronësisë së linjave ajrore sesa për aerodinamikën e avionëve.
Përplasja ka filluar pasi O’Leary refuzoi instalimin e internetit satelitor Starlink në avionët e Ryanair, duke e konsideruar atë shumë të shtrenjtë. Musk iu përgjigj me një sërë postimesh ironike në X, duke përfshirë një sondazh që pyeste nëse duhet ta blinte Ryanair dhe të emëronte “një Ryan” në krye të kompanisë.
Tensioni u rrit kur O’Leary e quajti Musk “idiot” në një podkast, e Musk ia ktheu duke e quajtur O’Leary një “idiot të plotë” dhe duke sugjeruar se mund të merrte kontrollin e kompanisë. Sidoqoftë, Ryanair është një kompani e listuar në bursë, me shumicën e aksioneve në duar të investitorëve institucionalë, dhe një blerje nga Musk do të hasë pengesa të konsiderueshme rregullatore dhe kosto të larta.
