Vrasja e Jani Aliajt në burgun grek Koridhalos dyshohet se është porositur dhe paguar nga një tjetër shqiptar, raporton A2 CNN. Sipas hetimeve të autoriteteve greke, i dyshuari, i pa identifikuar, ka pasur përplasje me Jani Aliajn për pazare droge. Aliaj kishte dalë me leje nga burgu i Koridhalos 3 javë më parë dhe ishte rikthyer prapë. Ai ishte në proces ekstradimi drejt Shqipërisë pasi është dënuar për vrasjen e Elton Çiços në vitin 2016 në zonën e ish-bllokut në Tiranë. Jani Aliaj është tentuar të vritet edhe disa muaj më parë në burg, por atentati nuk u realizua sipas mediave greke.
49-vjeçari shqiptar nga Tepelena është vrarë sapo ka dalë në agjërim. Autori një 28-vjeçar grek e ka qëlluar tri herë me një mjet prerës të improvizuar si thikë. 28-vjeçari grek e ka qëlluar dy herë në gjoks dhe një herë në qafë. Pas sulmit Jani Aliaj është larguar drejt qelisë së tij aty ku edhe ndërroi jetë dhe u gjet nga gardianët e burgut. Autori i vrasjes 28-vjeçari grek ndodhej në burg që në gusht të 2025-s pasi vrau shqiptarin Artur Bashimi.
Jani Aliaj prej janarit të vitit 2025 qëndronte në burgun grek të Koridhalos dhe ishte në proces për t’u ekstraduar drejt Shqipërisë për vrasjen e Elton Çiços, ekstradim i cili ende nuk ishte aprovuar nga autoritetet greke. Aliaj u arrestua në Athinë më datë 1 janar 2025 pas 9 vitesh në arrati. Ai kishte ndryshuar look, duke mbjellë edhe flokët, për t’iu fshehur drejtësisë.
Në vitin 2016 shkak për vrasjen e Çiços dyshohet se ka qenë hasmëria mes rivalëve, e nisur në Greqi, kur të dy ishin në burg. Aliaj kishte qenë në burg për vrasje, ndërsa Çiço për trafik droge. Policia dyshonte se shkak ka qenë fakti se Elton Çiço, gjatë një konflikti në burg në vendin fqinj, e kishte plagosur Jani Aliajn. Dyshohet se konflikti kishte vijuar edhe në Shqipëri, ku Aliaj ishte plagosur edhe në Gjirokastër. Edhe për këtë ngjarje u dyshua Elton Çiço. Konflikti vijoi deri në vitin 2016, kur Aliaj vrau Elton Çiçon brenda një lokali në zonën e ish-Bllokut.
