Qendra Spitalore Universitare “Nënë Tereza” njofton se sot në mbrëmje ka ndodhur një ndërprerje e përkohshme e energjisë elektrike në Godinën A2, për shkak të një defekti në linjën e furnizimit me energji të tensionit të lartë. Megjithatë, falë aktivizimit të sistemeve rezervë, si UPS dhe gjeneratorë, aparaturat mjekësore jetike kanë vazhduar të funksionojnë pa pengesa, duke siguruar kështu trajtimin e pacientëve pa rrezikuar jetën e tyre.
Ekipet mjekësore, teknike dhe drejtuese janë mobilizuar pa vonesë, duke vepruar sipas protokolleve të sigurisë dhe duke ofruar mbështetje të nevojshme për të vazhduar shërbimin shëndetësor. Qendra siguron se situata është menaxhuar me profesionalizëm dhe përgjegjësi, dhe se institucioni qëndron në gatishmëri për të përballuar çdo pasiguri në funksion të mbrojtjes së shëndetit të pacientëve.
Në vijim të këtij incidenti, QSUT ka ngritur menjëherë një grup pune për verifikimin e situatës dhe për të siguruar normalizimin e funksionimit të qendrës.
