Projekti i rindërtimit të Rripit të Gazës ka si bazë kryesore planin egjiptian arabo-islamik, duke mos parashikuar zhvendosjen e rreth dy milionë banorëve të kësaj enklave. Komiteti teknokratik palestinez, i formuar së fundmi për administrimin e përkohshëm të Gazës, ka filluar punën në Kajro dhe ka mbajtur takimin e tij të parë me pjesëmarrjen e Jared Kushner, dhëndrit të presidentit amerikan Donald Trump, dhe diplomatit bullgar Nickolay Mladenov, i cili do të luajë një rol kyç në fazën e dytë të planit amerikan për Gazën.
Anëtarët e komitetit kanë planifikuar të takohen përsëri të shtunën, me shpresën për të vizituar Gazën së shpejti. Selia e komitetit do të jetë në Kajro, ku nga aty do të organizohen udhëtime drejt Gazës për të rinovuar shërbimet publike, pa u përfshirë në politikë.
Ky komitet, i formuar zyrtarisht nën mbikëqyrjen e një Këshilli Paqeje që do të udhëhiqet nga Trump, përbëhet nga 15 teknokratë palestinezë që do të administrojnë përkohësisht enklavën. Kryetari i komitetit, Ali Saath, ka theksuar se rindërtimi do të mbështetet në planin egjiptian arabo-islamik miratuar në mars 2025, duke e parë si alternativë ndaj propozimit të mëparshëm amerikan për kontrollin e Gazës nga SHBA dhe zhvendosjen e popullsisë së saj.
Planifikimi i rindërtimit synon të ndihmojë në zgjidhjen e krizës strehimore, pasi rreth 85% e shtëpive janë shkatërruar. Për këtë qëllim, do të importohen rreth 200 mijë njësi banimi të parafabrikuara, të cilat do të shpërndahen në kampe të organizuara për të përmbushur nevojat bazë në arsim, shëndetësi dhe siguri. Këto përpjekje synojnë rikthimin e dinjitetit të palestinezëve, të cilët aktualisht jetojnë në kushte të vështira.
