Reza Pahlavi, djali i fundit të shahut të Iranit, ka kërkuar nga fuqitë botërore që të mbështesin protestat e popullit iranian për të rrëzuar qeverinë, duke shprehur besimin se “Republika Islamike do të bjerë, jo nëse, por kur”. Ai theksoi se komuniteti ndërkombëtar duhet të synojë udhëheqjen e Gardës Revolucionare të Iranit për të lehtësuar detyrën e protestuesve dhe për të parandaluar humbje të mëtejshme jetësh, duke bërë thirrje për një “sulm kirurgjikal” ndaj infrastrukturës së saj.
Sipas Agjencisë së Lajmeve për Aktivistët e të Drejtave të Njeriut (HRANA), protestat të cilat filluan më 28 dhjetor për shkak të rritjes së kostos së jetës dhe rënies së monedhës, kanë shkaktuar të paktën 2,595 viktima, përfshirë 17 fëmijë. Gjithashtu, 164 nga viktimat kanë qënë nga forcat e sigurisë ose të lidhura me qeverinë, dhe mbi 22,000 protestues janë arrestuar.
Qeveria iraniane i ka cilësuar protestat si “trazira” të nxitura nga armiqtë, dhe ka reaguar me forcë, duke vendosur një ndërprerje të gjerë të internetit që nga 8 janari, e cila ka bërë të vështirë verifikimin e informacionit nga brenda vendit. Presidenti i SHBA-së, Donald Trump, ka paralajmëruar Teheranin për ndëshkime nëse vazhdojnë vrasjet e protestuesve, ndërsa liderët në Iran kanë kërcënuar me përgjigje ndaj çdo sulmi amerikan.
Pahlavi, në një konferencë shtypi në Uashington, sugjeroi se disa prej forcave të sigurisë iraniane kanë refuzuar të shtypin protestat dhe se regjimi po sjell luftëtarë të huaj për të shuar demonstratat. Ai kërkoi rritjen e presionit ekonomik, dëbimin e diplomatëve iranianë, lirimin e të burgosurve politikë dhe mundësimin e një qasje në internet nga satelitët.
Pahlavi e përfundoi duke shprehur bindjen se, me ose pa ndihmën e botës, regjimi do të bjerë, por se do të ndodhte më shpejt dhe do të shpëtonin jetë nëse fjalët do të shndërroheshin në vepra. Ai ka shprehur gjithashtu dëshirën për të rikthyer një sistem demokratik në Iran dhe për të hartuar një kushtetutë të re.
