NATO ka filluar bisedimet mbi mënyrat e uljes së tensioneve politike mes Danimarkës dhe SHBA-së në lidhje me të ardhmen e Groenlandës. Një propozim që po shqyrtohet është krijimi i një misioni të ri nën emrin “Roja e Arktikut”. Ky propozim erdhi në një kontekst ku SHBA-të janë shprehur hapur për interesat e tyre në Groenlandë, duke shfaqur edhe mundësinë e përdorimit të forcës për të mbrojtur ato interesa.
Në Bruksel, kjo çështje u diskutua, duke u mbështetur në përvojat e mëparshme nga NATO me misione të ngjashme, si “Roja e Baltikut” dhe “Roja e Lindjes”, të cilat janë konsideruar të suksesshme. Shtetet evropiane si Belgjika, Gjermania dhe Mbretëria e Bashkuar shprehin mbështetje për angazhimin e NATO-s në Arktik, për shkak të rritjes së interesit të Rusisë dhe Kinës dhe shkrirjes së akujve që hapin rrugë të reja detare.
Megjithatë, propozimi has në disa pengesa praktike dhe politike. Një mision i tillë do të kërkonte shumë resurset si anije dhe trupa të trajnuar për kushte ekstreme, dhe do të nevojitej miratimi nga të gjithë anëtarët e NATO-s. Disa zyrtarë ushtarakë e shohin këtë iniciativë si të parakohshme, duke paralajmëruar se zbatimi i saj do të marrë kohë. Përveç vendeve nordike dhe Kanadasë, ekziston mungesë e trupave me përvojë në operacione në kushte arktike.
Aktualisht, “Operacioni Qëndrueshmëria e Arktikut”, i udhëhequr nga Danimarka, përfshin trupa nga Kanadaja, Franca, Gjermania, Holanda dhe Norvegjia. Edhe pse jo të gjithë anëtarët e NATO-s nevojitet të kontribuojnë, ata duhet të japin pëlqimin për nismën. SHBA-ja tashmë ka një prani ushtarake në Groenlandë dhe marrëveshje që lejojnë zgjerimin e kësaj pranie.
Bisedimet mes Uashingtonit dhe Kopenhagës vazhdojnë me shpresën për të arritur një kompromis që do të përfshijë një rol më të madh të NATO-s. Diplomatë të ndryshëm besojnë se presioni nga SHBA-ja është pjesë e një strategjie për të nxitur Europën të investojë më shumë dhe më shpejt në mbrojtje, duke u larguar nga fokusi tradicional në krahun lindor.
