Një emigrant somalez, i kërkuar nga autoritetet britanike për përdhunime ndaj motrës së tij 13-vjeçare, është arrestuar në Gjermani sapo ka zbritur nga avioni. I dyshuari, një 26-vjeçar me shtetësi holandeze, u ndalua nga policia federale në aeroportin e Frankfurtit pas një fluturimi nga Addis Ababa, Etiopi. Ai ishte në kërkim ndërkombëtar nga Mbretëria e Bashkuar që prej dhjetorit 2023, sipas raportimeve të gazetës britanike “The Sun”.
Policia federale gjermane konfirmoi arrestimin me anë të një deklarate zyrtare, duke theksuar se ai u kap bazuar në një njoftim kërkimi. Autoritetet e akuzojnë se gjatë vitit 2020, kur ai jetonte në Mbretërinë e Bashkuar, i dyshuari ka kryer veprime të përsëritura abuzive ndaj motrës së tij të mitur.
Pas ndalimit, ai u paraqit para gjyqtarit kompetent të paraburgimit në Frankfurt, ndërsa emri i tij nuk është bërë publik. Në këtë fazë, ai do të mbetet në paraburgim në aeroport ndërsa hetimet vazhdojnë.
Autoritetet gjermane shpjeguan se, për shkak të të drejtës së tij për të kundërshtuar ekstradimin, processi për transferimin e tij drejt Britanisë së Madhe mund të zgjasë mes 10 dhe 60 ditësh, një periudhë e zakonshme për raste të tilla.
Ky incident ndodh pas një serie rastesh të ngjashme që kanë ngritur shqetësime mbi krimet seksuale nga emigrantët. Pjesë e kësaj është edhe dënimi i fundit i një emigranti të quajtur Mehmet Ogur me shtatë vite burg në Britani për përdhunim, si dhe rasti i një emigranti afgan, i cili u shpall fajtor për sulm seksual ndaj një gruaje. Raste të tilla i japin hov debatit publik mbi sigurinë dhe ngritjen e standardeve të mbrojtjes për individët, sidomos ata që janë më të pambrojtur.
