Situata nga përmbytjet në qarkun Durrës po tregon shenja përmirësimi, ndërsa autoritetet lokale dhe strukturat e emergjencave civile vazhdojnë të monitorojnë dhe vlerësojnë dëmet. Në Bashkinë Durrës, grupet e punës po evidentojnë dëmtimet e bëra në banesat e përmbytura. Aktualisht, rreth 340 banorë janë strehuar në Kavalishencën e Ministrisë së Mbrojtjes dhe në hotele, ndërsa rreth 200 persona janë rikthyer në shtëpitë e tyre. Lumi Erzen ka shënuar një rënie të nivelit të ujit dhe monitorohet nga strukturat operacionale në koordinim me Shtabin e Emergjencave Civile.
Në Bashkinë Krujë, janë identifikuar 18 banesa të dëmtuara në zona si Dukagjin dhe Borizanë. Dëmet e raportuara përfshijnë në disa raste vetëm bazën ushqimore për blegtorinë. Një grup tjetër ka inspektuar 30 banesa në Miliskaje, ku 7 prej tyre kanë pësuar dëmtime. Rreth 250 hektarë tokë ndodhen nën ujë, ndërsa në Njësinë Administrative Cudhi, po kryhet pastrimi i rrugës Nojë–Qafështamë. Autoritetet raportojnë për një rënie të vazhdueshme të nivelit të ujit në lumenjtë Gjolë dhe Zezë, të cilët tani kanë arritur nivele normale.
Po ashtu, në Bashkinë Shijak, janë përfunduar 43 akte-konstatime në banesa dhe sipërfaqja e tokës bujqësore të përmbytur arrin rreth 600 hektarë. Strukturat e bashkisë vazhdojnë të monitorojnë situatën, veçanërisht në lagjen Erzen dhe Njësinë Administrative Xhafzotaj. Lumi Erzen gjithashtu tregon rënie të nivelit të ujit dhe mbahet nën monitorim të vazhdueshëm.
Sipas këtyre raportimeve, situata në qarkun Durrës po stabilizohet, megjithatë autoritetet vazhdojnë të japin përkrahje dhe të vlerësojnë dëmet e shkaktuara nga përmbytjet.
