Pas tërheqjes së ujërave pas përmbytjeve të lumit Vjosë, fshati Kashisht po përballet me pasojat të rënda ekonomike. Kultivuesit e luleshtrydheve janë më të prekurit, duke regjistruar dëme që arrijnë në miliona lekë. Fermerët Kreshnik Kapaj dhe Genti Halilaj, të cilët disponojnë përkatësisht 4 dhe 7 dynymë sera me luleshtrydre, janë aktualisht në fazën e larjes së serave, të mbuluara nga balta e shkaktuar nga përmbytjet.
Të dy fermerët theksojnë se kanë përjetuar përmbytje të tilla për herë të parë që prej vitit 1971 dhe shprehen se deri tani asnjë institucion nuk ka dalë në terren për të verifikuar situatën dhe dëmet e shkaktuara. Aktualisht, dëmet janë evidentuar në rreth 50 hektarë tokë bujqësore, kryesisht të mbjella me grurë, që përbën një burim të rëndësishëm ushqimor për bagëtitë e 18 fermerëve të zonës.
Kultivuesit kanë bërë thirrje për vëmendje ndaj problemeve që kanë sjellë ndërtimet pa kriter të argjinaturave dhe ngushtimin e shtratit të lumit Vjosë, veçanërisht në zonën e urës së autostradës Fier-Vlorë. Ata besojnë se këto ndërhyrje kanë ndikuar drejtpërdrejt në përmbytjen e tokave bujqësore, duke theksuar nevojën për masa preventive për të shmangur situata të ngjashme në të ardhmen.
Fermerët e Kashishtit kërkojnë një reagim të shpejtë nga institucionet përkatëse, duke shpresuar që situata të trajtohet me seriositet për të mbrojtur burimet e tyre të punës dhe për të siguruar të ardhmen e bujqësisë në zonë.
