Situata hidrologjike në Bashkinë Shkodër është e qëndrueshme dhe nën monitorim të vazhdueshëm, me nivele uji nën kuotat kritike. Në këtë territor, gjithashtu nuk ka banesa të prekura nga ky fenomen.
Sipërfaqja totale e tokës bujqësore me prani uji arrin në rreth 525 hektarë, ndarë sipas njësive administrative. Njësia Administrative Dajç ka rreth 110 ha me ujë, Velipojë rreth 265 ha, dhe Ana e Malit rreth 150 ha. Prania e ujit është e kufizuar dhe shpesh e fokusuar në sipërfaqe të hapura bujqësore. Në Obot, uji është i pranishëm vetëm afër oborreve, ndërsa qarkullimi është i garantuar me ndihmën e Ushtrisë për të shmangur komplikime të mëtejshme.
Lumenjtë në zonë janë nën kontroll. Niveli i Bunës në Dajç është 6.58 m, ndërsa në Urën e Vjetër të Bunës, niveli është 8.50 m, rreth 1 metër nën kuotën kritike prej 9.50 m. Lumi Drin në Urën e Bahçallëkut, ka një nivel prej 8.20 m, rreth 1.80 m nën kuotën kritike të 10.00 m.
Hidrovoret funksionojnë në kapacitet të plotë dhe pa ndalesa, duke mbajtur nivelet e ujit në përmasa të sigurta. Furnizimi me energji elektrike është i qëndrueshëm, dhe argjinaturat, kanalet kulluese, si dhe shkarkuesat e Digës së Rezervuarit të Shkodrës, nuk paraqesin problematika që mund të rrezikojnë përmbytje. Monitorimi në terren vazhdon nga strukturat përgjegjëse për të garantuar sigurinë e komunitetit.
Kjo situatë hidrologjike pozitive tregon përpjekjet e vazhdueshme për menaxhimin e ujërave dhe ruajtjen e sigurisë për qytetarët, duke mbështetur aktivitetin bujqësor dhe paisjet infrastrukturore.
