Mijëra njerëz në Australi verilindore janë ndjerë pasojat e ciklonit tropikal Koji, i cili ka sjellë shirat e rrëmbyeshëm dhe erërat e forta, duke lënë rreth 15,000 shtëpi pa energji elektrike. Koji, i kategorisë 1, goditi zonën midis qyteteve Ayr dhe Bowen, afër Brisbane, dhe solli erëra që arritën deri në 95 kilometra në orë. Sipërfaqet e goditur morën deri në 200 milimetra shi, dhe rrethana të tilla pritet të vazhdojnë për disa ditë, duke rritur rrezikun e përmbytjeve.
Kryeministri i Queenslandit, David Crisafulli, shprehu shqetësim për dëmet në prona dhe mbylljen e rrugëve për shkak të stuhisë. Ai theksoi që banorët e Queenslandit do ta përballojnë këtë mot ekstrem, ndërsa Shërbimi Meteorologjik parashikon që kushte të tilla do të vazhdojnë edhe gjatë ditës, por lehtësim mund të vijë nga nesër.
Në juglindje të Australisë, situata është po ashtu alarmante për shkak të zjarreve të mëdha që kanë shkatërruar më shumë se 3 milionë hektarë pyje në Viktori, duke shkaktuar dëme të konsiderueshme në shtëpi dhe duke ndërprerë energjinë elektrike. Kryeministrja e Viktorias, Jacinda Allan, njoftoi se më shumë se 30 zjarre po digjen në shtet, ndërsa autoritetet i kanë cilësuar këto zjarre si më të këqijat që nga “vera e zezë” e vitit 2019, kur mbi 33 persona humbën jetën dhe një sipërfaqe e madhe toke u shkatërrua.
Chris Hardman, shefi i Shërbimit të Zjarrfikësve të Viktorias, njoftoi se mund të duhen javë për të vënë zjarret nën kontroll, me mijëra zjarrfikës që po punojnë për t’i shuar ato, të mbështetur nga më shumë se 70 avionë. Kryeministri australian, Anthony Albanese, e shprehu mbështetje për ata që po përballen me këto sfida të rënda, duke theksuar se mendimet e tij janë me komunitetet në këtë kohë sfiduese.
