Gjatë javës së kaluar, disa qytete në Kosovë u goditën nga përmbytjet të shkaktuara nga reshjet e pandërprera që filluan më 5 janar. Shtëpia, lokale, automjete dhe tokë bujqësore u vërshuan nga lumenjtë që dolën nga shtrati. Një nga zonat më të goditura ishte lagjja “2 Korriku” në Mitrovicë, ku shumë shtëpi u përmbytën.
Disa ditë pas ngjarjes, banorët u rikthyen për të pastruar dëmet, por qasja në disa shtëpi mbetet e pamundur për shkak të nivelit të lartë të ujit, që arrin mbi një metër. Kryefamiljarët qëndrojnë pranë shtëpive të tyre për të parë se si do të përparojë situata. Dëmet janë të shumta, duke përfshirë shkatërrimin e pajisjeve brenda shtëpive. Banorët shprehen të shqetësuar për mungesën e intervenimeve nga institucionet, veçanërisht në këto temperatura të ulëta.
Ndërkohë, një banor i Mitrovicës përdori ekskavator për të hapur kanalet dhe për të ndihmuar në largimin e ujit. Pas pesë ditëve nga vërshimet, qytetarët përballen me pasojat, ndërsa autoritetet lokale në Skënderaj, Pejë, Drenas, Rahovec dhe Klinë kanë filluar vlerësimin e dëmeve. Qytetarët duhet të paraqesin kërkesat pranë institucioneve përkatëse në mënyrë që të mund të kompensohen.
Po ashtu, në Obiliq dhe Fushë–Kosovë janë formuar komisione për vlerësimin e dëmeve. Agjencia për Menaxhimin Emergjent ka njoftuar se situata e përgjithshme e vërshimeve në nivel vendi është e qetë dhe e menaxhueshme, edhe pse ende përballen me komplikime dhe nevojë për ndihmë. Kjo situatë kërkon një mobilizim të shpejtë nga institucionet për të ndihmuar banorët që po përballen me pasojat e vështira të këtij moti të keq.
