Më shumë se 50 protestues kanë humbur jetën në Iran që nga nisja e protestave antiqeveritare më 28 dhjetor, sipas organizatës joqeveritare Iran Human Rights me seli në Norvegji. Organizata raportoi se të paktën 51 protestues, përfshirë nëntë fëmijë, u vranë gjatë 13 ditëve të para të protestave që përfshinë të gjithë vendin, një rritje në raport me numërimin e mëparshëm që fliste për 45 të vdekur.
Në një reagim të qeverisë iraniane, u vendos një ndërprerje e internetit në të gjithë vendin, e cila zgjati më shumë se 24 orë. Grupi i monitorimit të sigurisë kibernetike Netblocks shpjegoi se lidhja e internetit ra në 1% të nivelit të saj të zakonshëm gjatë kësaj periudhe, duke e përkeqësuar situatën për aktivistët dhe protestuesit që kërkojnë të shprehin qëndrim.
Reza Pahlavi, djali i ish-shahut të Iranit, i bëri thirrje Donald Trump për një ndërhyrje urgjente në Iran. Ai kërkoi që presidenti amerikan të ofronte mbështetje dhe veprime për të ndihmuar popullin iranian në përpjekjet e tyre për liri. Pahlavi justifikoi kërkesën e tij përmes vendimit të autoriteteve për të privuar qytetarët nga interneti dhe për shtypjen e protestuesve, duke inkurajuar popullin të dalë në rrugë për të sfiduar forcat e sigurisë.
Presidenti amerikan kërcënoi se do ta “godasë Iranin shumë rëndë” nëse autoritetet do të vazhdonin me akte dhunë ndaj protestuesve. Pas dy javëve të një lëvizjeje që filloi si një reagim ndaj rritjes së kostove të jetesës, vala e pakënaqësisë është zhvilluar gjithnjë e më shumë, duke paraqitur një sfidë serioze për Republikën Islamike, e cila ka qenë në pushtet që nga revolucioni i vitit 1979. Protesetat e fundit kanë shpërthyer si një simbol i revoltës ndaj gjendjes ekonomike dhe politike në vend, duke rritur tensionin mes qytetarëve dhe autoriteteve.
