Marrëveshja tregtare e Bashkimit Evropian me vendet e Mercosur, përfshirë Brazilin, Argjentinën, Paraguain dhe Urugain, ka marrë miratimin e shumicës së shteteve anëtare, duke shkuar kështu drejt nënshkrimit. Sidoqoftë, disa vende si Franca, Polonia, Austria, Irlanda dhe Hungaria kanë shprehur kundërshtime, ndërsa Belgjika ka abstenuar. Kryeqytetet e BE-së kanë afat deri të premten në orën 18:00 për të shprehur çdo kundërshtim.
Marrëveshja përfshin masa për të mbrojtur bujqësinë evropiane nga rritja e mundshme e importeve nga Mercosur, të cilat janë miratuar nga ambasadorët e BE-së. Presidentja e Komisionit Evropian, Ursula von der Leyen, pritet të vizitojë Paraguain javën e ardhshme për të nënshkruar marrëveshjen.
Kjo marrëveshje e tregtisë së lirë do t’i lejojë BE-së të eksportojë më shumë verëra, makina dhe pije, ndërsa do të lehtësojë importin e mishit, sheqerit, orizit, mjaltit dhe sojës nga vendet e Amerikës Latine. Kjo ka shkaktuar shqetësim te fermerët evropianë, të cilët friksohen se nuk do të mund të konkurronin me kostot e ulta.
Për miratimin e marrëveshjes kërkohej një shumicë e kualifikuar prej të paktën 15 shtetesh anëtare, që përfaqësonin 65% të popullsisë së BE-së. Shtetet skandinave dhe vendet si Gjermania dhe Spanja e shohin këtë marrëveshje si një mundësi për të hyrë në një treg prej 780 milionë qytetarësh, në një kontekst ku presionet amerikanë dhe kineze po rriten.
Greqia, e cila e sheh marrëveshjen në një dritë pozitive, ka kërkuar masa mbrojtëse për produktet e saj, duke përfshirë mbrojtjen e 21 produkteve greke PDO nga falsifikimi. Ajo kërkon gjithashtu garanci për mbrojtjen e prodhuesve evropianë dhe monitorim të vazhdueshëm të efekteve.
Industrialistët gjermanë e mirëpresin miratimin e marrëveshjes si një “sukses të rëndësishëm”, duke theksuar se kjo do të heqë barrierat tregtare dhe do të krijojë një nga tregjet më të mëdha në botë. Ata nënvizojnë rëndësinë e aksesit në lëndë të para kritike për lëvizshmërinë elektrike dhe energjinë e rinovueshme, duke theksuar nevojën për diversifikimin e partneriteteve strategjike të BE-së.
