Presidenti i Shteteve të Bashkuara, Donald Trump, njoftoi se ka anuluar një “valë të dytë sulmesh” ndaj Venezuelës, pas bashkëpunimit të këtij vendi me SHBA-në. Ky informacion u shpërnda përmes një postimi në Truth Social, ku Trump vlerësoi veprimet e qeverisë në detyrë të Venezuelës.
Ky është hera e parë që Trump përmend mundësinë e sulmeve të reja, pas urdhërimit të një operacioni ushtarak për të rrëzuar ish-presidentin Nicolás Maduro, aktualisht në paraburgim në SHBA me bashkëshorten e tij, Cilia Flores. Në postimin e tij, Trump theksoi se Venezuela po “lironte një numër të madh të të burgosurve politikë si shenjë e ‘kërkimit të paqes’”, duke e cilësuar këtë si një “gjest shumë të rëndësishëm dhe të mençur”.
Dhe në fakt, qeveria venezueliane filloi këtë proces lirimi, duke përfshirë politikanë të opozitës, për të “kërkuar paqen”. Trump mbrojti bashkëpunimin e dy vendeve, duke thënë se ato po punojnë për rindërtimin e infrastrukturës së naftës dhe gazit. “Për shkak të këtij bashkëpunimi, kam anuluar Valën e Dytë të Sulmeve, e cila pritej më herët dhe që nuk do të jetë e nevojshme, megjithatë, të gjitha anijet do të qëndrojnë në pozicion për arsye sigurie,” deklaroi ai.
Pas operacionit për rrëzimin e Madurors, Trump kishte sugjeruar se SHBA-ja do ta “drejtonte” praktikisht Venezuelën dhe nuk e kishte përjashtuar mundësinë e një përfshirjeje ushtarake afatgjatë.
Në një tjetër njoftim, Trump planifikon një takim në Shtëpinë e Bardhë me drejtues të kompanive të mëdha të naftës për t’i inkurajuar ata të rrisin prodhimin e naftës në Venezuela dhe të bëjnë investime të reja. Ai pretendoi se “të paktën 100 miliardë dollarë do të investohen nga NAFTA E MADHE”, megjithatë, industria e naftës shfaq skeptikë në lidhje me mundësinë e investimeve të tilla gjatë një dekade për rikthimin e infrastrukturës së naftës në vend.
