Situata hidrometeorologjike në Qarkun Shkodër është aktualisht e qetë dhe pa probleme serioze, sipas monitorimeve dhe raporteve nga bashkitë dhe strukturat e Mbrojtjes Civile. Në Bashkinë Shkodër, nuk ka raporte për emergjenca civile. Në njësinë administrative Dajç, kuota e ujit është 6.20 metra, ndërsa në Urën e Vjetër të Bunës niveli i ujit është nën kuotën kritike dhe pa rritje. Po ashtu, në Urën e Bahçallekut, niveli i lumit Drin është nën kuotën kritike duke shënuar rënie.
Në fshatin Obot, duket se ka praninë e ujit në rrugën kryesore. Forcat e Armatosura janë dislokuar atje me mjete të kalueshmërisë së lartë për të ndihmuar banorët të kalojnë segmentin e përmbytur. Bashkia Vau Dejës ka një situatë të qetë, pa probleme të evidentuara. Edhe në Bashkinë Malësi e Madhe nuk ka probleme; gjatë natës nuk ka pasur reshje shiu dhe është vënë re një tërheqje e ujit në zonën “Rreze e Veshtit”, ku po punohet për rikthimin e aksesit.
Në Bashkinë Pukë dhe Fushë-Arrëz, deri tani nuk raportohet asnjë situatë problematike. Sipas Drejtorisë së Ujitjes dhe Kullimit në Lezhë, hidrovorët në Vilun dhe Casi funksionojnë normalisht, duke garantuar menaxhimin e prurjeve. Argjinaturat, kanalet kulluese, shkarkuesit dhe diga e Rezervuarit të Shkodrës janë në kushte normale. Lumi Kir dhe Gjadër kanë shënuar një rënie të ndjeshme të prurjeve, çka ndihmon në stabilizimin e situatës hidrologjike. Sot nuk ka pasur reshje shiu dhe temperaturat kanë rënë.
Reparti Ushtarak Vau Dejës nr. 1010 vazhdon angazhimin në fshatin Obot me mjete të specializuara dhe efektivë në terren. Prefektura e Qarkut Shkodër është në monitorim të vazhdueshëm dhe në gatishmëri të plotë me të gjitha strukturat përkatëse për të përballuar çdo situatë të mundshme.
