Dy persona humbën jetën dhe disa të tjerë mbetën të plagosur nga një sulm me armë zjarri jashtë një kishe në Salt Lake City, Utah. Ngjarja ndodhi në parkingun e një shtëpie mbledhjesh të Kishës së Jezus Krishtit të Shenjtorëve të Ditëve të Mëvonshme, njohur si kisha mormone.
Sipas policisë, të paktën tetë persona u qëlluan me armë, ku dy prej tyre ndërruan jetë si rezultat i plagëve. Të paktën tre nga të plagosurit ndodhen në gjendje kritike, ndërsa informacione të tjera mbi shëndetin e të plagosurve nuk janë akoma të disponueshme. Në momentin e sulmit, dhjetëra besimtarë po merrnin pjesë në një funeral brenda kishës. Të gjitha viktimat, sipas autoriteteve, janë të rritura.
Shefi i policisë së Salt Lake City, Brian Redd, deklaroi se nuk ka prova për një motivim të urrejtjes fetare. Ai sqaroi se ngjarja nuk po konsiderohet as një sulm i rastësishëm dhe deri tani asnjë i dyshuar nuk është arrestuar. Në vendngjarje mbërritën rreth 100 automjete të forcave të rendit, ndërsa zona u monitorua nga helikopterë.
Kryetarja e bashkisë së Salt Lake City, Erin Mendenhall, e quajti ngjarjen tronditëse, duke theksuar se një incident i tillë nuk duhej të ndodhte kurrë jashtë një vendi të adhurimit e sidomos gjatë një ceremonie përkujtimore. Kisha mormone njoftoi se po bashkëpunon ngushtë me autoritetet dhe shprehu mirënjohje për ndihmën e shpejtë të shërbimeve emergjente. Ajo shprehu shqetësim për faktin që një hapësirë e shenjtë u kthye në skenë dhune.
Ngjarja vjen në një kohë kur vendet e adhurimit në SHBA janë në gatishmëri të shtuar, pas një sulmi të ngjashëm që ndodhi muajin e kaluar në Michigan, ku katër persona humbën jetën në një kishë, dhe autoritetet federale konfirmuan se autori kishte motive antifetare.
