Për shkak të përmbytjeve që rrezikojnë jetën dhe shëndetin e qytetarëve, autoritetet kanë urdhëruar evakuimin e menjëhershëm të banorëve të Njësisë Administrative Novoselë, në Bashkinë Vlorë. Situata është e vështirë dhe për dy fshatrat Bishan dhe Fitore, ndërsa niveli i ujit pritet të rritet edhe më tej për shkak të prurjeve që vazhdojnë.
Evakuimi zyrtar, sipas Ligjit nr. 45/2019 “Për Mbrojtjen Civile” dhe planeve të emergjencave, është një masë e domosdoshme për të mbrojtur qytetarët. Ky proces do të realizohet në bashkëpunim me Agjencinë Kombëtare të Mbrojtjes Civile, Prefektin e Qarkut dhe strukturat e emergjencave civile në bashki. Kryetari i Bashkisë është autoriteti përgjegjës për urdhërimin e evakuimit.
Prioritet në evakuim do të kenë fëmijët, të moshuarit, personat me aftësi të kufizuara dhe familjet në zona të izoluara. Transporti për evakuimin e banorëve do të sigurohet nga mjetet e Bashkisë, Shërbimi i Mbrojtjes nga Zjarri dhe Shpëtimi, si dhe Forcat e Armatosura.
Menaxhimi i strehimit dhe asistencës për qytetarët e evakuuar do të realizohet nga Bashkia, e cila do të bashkëpunojë me Policinë e Shtetit, njësitë e kujdesit shëndetësor dhe strukturat e shërbimeve sociale. Në këtë kuadër, do të sigurohet regjistrimi i të evakuuarve kur mbërrijnë në ambientet e strehimit të përkohshëm dhe administrimi i nevojave bazë si ushqimi, veshmbathja dhe ndihma mjekësore.
Përveç kësaj, do të ofrohet informacion periodik mbi statusin e situatës dhe masat që do të merren në vazhdim. Ky njoftim ka karakter urgjent dhe hyn në fuqi menjëherë. Qytetarët inkurajohen të kontaktojnë autoritetet publike për çdo situatë emergjente.
