Manchester City ka regjistruar një barazim të tretë radhazi në Premier League, duke u ndalur në 1-1 përballë Brightonit në Etihad Stadium. Skuadra e Pep Guardiola arriti të shkonte para në rezultat me një 11-metërsh të shënuar nga Erling Haaland, por goli i Kaoru Mitoma në fillim të pjesës së dytë e barazoi situatën. Edhe pse City pati mundësi për të sulmuar, nuk arriti të shënonte një gol tjetër, duke bërë që shpresat për titull të zbehen akoma më shumë.
Ndërkohë, Chelsea, nën drejtimin e trajnerit të ri Liam Rosenior, kishte një paraqitje të dobët në derbin londinez kundër Fulhamit në Craven Cottage. Pas një ndëshkimi me karton të kuq për Marc Cucurella, Chelsea luajti për rreth 70 minuta me një lojtar më pak. Pjesa e parë u mbyll me barazimin 0-0, por në minutën e 55 Fulham kaloi në avantazh me golin e Raul Jimenez. Chelsea arriti të barazonte me Liam Delap në minutën e 72, por vetëm 9 minuta më vonë, Fulham shënoi golin e fitores me Harry Wilson, duke e mbyllur ndeshjen 2-1. Pas këtij rezultati, Chelsea mbetet me 31 pikë në vendin e 7, duke humbur mundësinë për të hyrë në zonën e Champions, ndërsa Fulham ngjitet në vendin e 8 me të njëjtën pikë.
Në ndeshjet e tjera të Premier League, rezultatet ishin si më poshtë: Bournemouth fitoi me 3-2 ndaj Tottenham, Brentford mposhti Sunderlandin me 3-0, Crystal Palace dhe Aston Villa u ndanë pa gola në 0-0, Everton dhe Wolverhampton luajtën 1-1, ndërsa Newcastle triumfoi me një fitore dramatike 4-3 kundër Leedsit.
