Sekretari amerikan i Shtetit, Marco Rubio, e karakterizoi fazën e dytë të strategjisë së Shteteve të Bashkuara ndaj Venezuelës si një periudhë “rimëkëmbjeje”. Ai theksoi se kjo do të përfshijë amnistinë për udhëheqësit e opozitës, ndjekur nga një “tranzicion”, megjithatë, nuk dha detaje të tjera mbi procesin.
Rubio sugjeroi se venezuelianët duhet të bashkëpunojnë me Shtetet e Bashkuara për të lëvizur naftën dhe për të gjeneruar të ardhura, duke shmangur kështu një kolaps ekonomik. Ai hodhi poshtë kritikat nga disa senatorë, të cilët e akuzonin Uashingtonin për veprime të pakujdesshme në Venezuelë. Sipas tij, regjimi i Maduro-s nuk mund të eksportojë më naftë dhe të sigurojë të ardhura pa lejen e Shteteve të Bashkuara, gjë që i jep Amerikës “një ndikim të jashtëzakonshëm” në situatën vendase.
Rubio gjithashtu përmendi përpjekjet e vazhdueshme të Shteteve të Bashkuara për të arritur një zgjidhje pa ndërhyrje ushtarake apo arrestimin e Presidentit Nicolás Maduro. Ai shprehu keqardhjen se këto tentativa nuk arritën të kishin sukses. Gjithashtu, Rubio theksoi se një president ka të drejtë të veprojë kur do të ketë një kërcënim për kombi.
Kjo strategji e re vjen në një kohë kritike për Venezuelën, e cila po përballet me një krizë të thellë ekonomike dhe politike. Ndikimi i Shteteve të Bashkuara në këtë proces do të jetë kyç për të ardhmen e vendit, derisa populli venezuelian e sheh bashkëpunimin me SHBA-në si një mundësi për të dalë nga situata e vështirë ekonomike.
