Aksi nacional Burrel – Rrëshen ka hasur vështirësi të konsiderueshme për qarkullimin e mjeteve. Amortizimi i gjatë i rrugës së këtij aksi, së bashku me reshjet e fundit të shiut, kanë shkaktuar shembje të shkëmbinjve dhe rrëshqitje dherash në disa segmente. Problemi më akut paraqitet pranë urës së Urakës, ku një masiv shkëmbor ka rënë dhe ka bllokuar pjesërisht rrugën.
Korrespondenti i Top Channel, Dëfrim Karaj, pohon se në këtë segment gjithashtu ka pasur shembje të skarpatës, duke ngushtuar karrexhatën në një sens lëvizje. Shirat e dy ditëve të fundit kanë prekur dhe rrugët e fshatrave, duke shkaktuar bllokime dhe shembje të aseteve rrugore për shkak të rrëshqitjes së dherave.
Ekipet e pushtetit vendor janë angazhuar në terren për të rikthyer normalitetin dhe lehtësuar lëvizjen e banorëve drejt zonave urbane. Situata vazhdon të jetë kritike dhe nevojitet ndërhyrje e shpejtë për të garantuar sigurinë dhe aksesin në këto rrugë.
