Shtëpia e Bardhë ka shkaktuar shqetësim me deklaratën se presidenti Donald Trump po shqyrton mundësinë e marrjes nën kontroll të Groenlandës, përfshirë mundësinë e përdorimit të forcës ushtarake. Kjo nismë është një shprehje e ambicieve të tij për të siguruar këtë ishull strategjik, pavarësisht kundërshtimeve nga vendet evropiane.
Në një deklaratë, Trump e ka cilësuar marrëveshjen me Groenlandën si një prioritet për sigurinë kombëtare, me qëllimin e “pengimit të kundërshtarëve tanë në Arktik.” Ai dhe ekipi i tij po diskuton disa mundësi për realizimin e këtij qëllimi, duke përfshirë opsionin e përdorimit të forcave ushtarake.
Megjithatë, sipas Wall Street Journal, Sekretari i Shtetit Marco Rubio ka qartësuar se kërcënimet e fundit nuk përbëjnë një shenjë të pushtimit të afërt, por janë shenja të një strategjie për blerjen e ishullit nga Danimarka. Deputeti republikan Don Bacon i bëri thirrje administratës që të ndalojë deklaratat në lidhje me marrjen e Groenlandës, duke e quajtur trajtimin e saj të papërshtatshëm dhe fyese.
Burime nga administrata amerikane theksojnë se Groenlanda është jetike për SHBA-në për shkak të rezervave të mineralëve të rëndësishëm për teknologjinë e lartë dhe përdorime ushtarake. Megjithatë, këto burime mbeten të pashfrytëzuara për shkak të mungesës së fuqisë punëtore dhe infrastrukturës së dobët.
Një zyrtar i lartë nga administrata, në kushte anonimiteti, ka konfirmuar se Trump dhe këshilltarët e tij po shqyrtojnë disa mënyra për të fituar kontrolle mbi Groenlandën. Këto opsione përfshijnë blerjen e drejtpërdrejtë të ishullit ose krijimin e një Marrëveshjeje të Asociimit të Lirë me territorin. Megjithatë, nuk janë dhënë detaje financiare mbi çmimin e mundshëm për blerjen, dhe duket se asnjë marrëveshje e tillë nuk do të përmbushte plotësisht ambiciet e Trumpit për të integruar ishullin me 57 mijë banorë në SHBA.
