Kanë kaluar mbi 10 vjet nga vdekja tragjike e Jules Bianchi, piloti i Formula 1 që humbi jetën pas një aksidenti të rëndë gjatë provave të Çmimit të Madh të Japonisë. Emri i tij u rikthye në vëmendje për shkak të një episodi të çuditshëm që përfshin vjedhjen e disa makinave kart nga skuderia në emër të tij.
Babai i Bianchi, Philippe, raportoi se në datën 6 janar ishin vjedhur në total 9 makina kart, përfshirë modelin e fundit që i përkiste Jules. Ai u shpreh në Facebook: “Të dashur miq, natën e kaluar pësuam një vjedhje; disa grabitës të paskrupullt morën 9 makina JB17 Forever. Por ka diçka që është më e rëndë; vodhën makinën e fundit kart të Jules, një KZ 125 modeli ART GP, përveç makinave minikart të nipave të mi.” Philippe kërkoi ndihmë, duke ftuar kushdo që sheh një makinë kart JB17 në qarkullim të kontaktojë.
Apeli i Philippe Bianchi ka patur rezonancë, veçanërisht nga Charles Leclerc, miku i afërt i Jules. Piloti i Ferrarit e mbështeti këtë thirrje për ndihmë në Instagram Story, duke e bërë këtë ngjarje akoma më të dukshme.
Jules Bianchi pësoi një aksident fatal në Suzuka në vitin 2014, kur përplasi me një vinç që ndodhej në anë të pistës, duke e lënë në gjendje kome deri në vdekjen e tij 9 muaj më vonë, më 17 korrik 2015. Ky incident jo vetëm që traumatizoi botën e Formula 1, por gjithashtu nxiti reflektime mbi sigurinë në garat e automobilizmit.
Kjo ngjarje e fundit tregon se kujtimi i Bianchi vazhdon të jetë i pranishëm në komunitetin e automobilizmit, dhe se pas të gjitha këtyre viteve, ai mbetet një figurë që bashkon shumë njerëz, duke përfshirë kolegë dhe miq që e nderojnë kujtimin e tij. Të gjithë shpresojnë për gjetjen e makinave të vjedhura dhe për rikthimin e tyre aty ku i takojnë.
