Gjashtë vende evropiane, përfshirë Mbretërinë e Bashkuar, Francën, Gjermaninë, Italinë, Poloninë dhe Spanjën, shprehën mbështetje për Danimarkën dhe Groenlandën pas deklaratave të presidentit amerikan Donald Trump, i cili tha se SHBA-të “kanë nevojë” për Groenlandën për arsye sigurie. Ai sugjeroi se përdorimi i forcës për të marrë kontrolle mbi territorin nuk ishte përjashtuar, çka e detyroi kryeministren daneze Mette Frederiksen të paralajmëronte se një sulm i tillë do të shënonte fundin e NATO-s.
Çështja erdhi në fokus pas një ndërhyrjeje amerikane në Venezuela, ku ish-presidenti Nicolás Maduro u arrestua. Trump tha se SHBA-të do ta “drejtonin” Venezuelën për një periudhë të pacaktuar dhe sugjeroi se edhe Groenlanda dhe vende të tjera mund të bëheshin objekt i vëmendjes amerikane. Ndërkohë, bashkëshortja e një ndihmësi të lartë të Trump publikoi një hartë të Groenlandës me flamurin amerikan, duke nënkuptuar përpjekjet për aneksim.
Stephen Miller, një tjetër këshilltar i Trump, përsëriti se është “qëndrimi formal i qeverisë amerikane që Groenlanda të jetë pjesë e SHBA-së” dhe siguroi se askush nuk do të luftojë për këtë territor. Në deklaratën e përbashkët, liderët evropianë theksuan se angazhimi për sigurinë në Arktik është i rëndësishëm dhe duhet të realizohet përmes bashkëpunimit në NATO, duke respektuar të drejtat ndërkombëtare dhe sovranitetin.
Kryeministri i Groenlandës, Jens-Frederik Nielsen, e mirëpriti këtë qëndrim dhe kërkoi dialog të respektueshëm për të siguruar që statusi i Groenlandës të respektohet sipas të drejtës ndërkombëtare. Edhe pse Groenlanda gëzon vetëqeverisje të gjerë, shumica e banorëve janë kunder bashkimit me SHBA-në dhe preferojnë pavarësinë përfundimtare nga Danimarka.
Vendimi i administratës Trump për të emëruar një të dërguar të posaçëm në Groenlandë shkaktoi reagime të forta në Danimarkë, duke rritur shqetësimet për sigurinë dhe marrëdhëniet ndërkombëtare në rajon. Groenlanda, e banuar nga rreth 57,000 njerëz, mbetet nën përgjegjësinë e Danimarkës për aspektet e mbrojtjes dhe politikës së jashtme.
