Qarku Lezhë është aktualisht nën ndikimin e reshjeve të forta, me një sasi prej 96 mm shi të regjistruar në 24 orët e fundit nga Stacioni Meteorologjik Ushtarak Gjadër. Kjo situatë ka sjellë rritjen e niveleve të lumenjve Drin dhe Mat, duke shkaktuar përmbytje në disa zona.
Në Bashkinë Kurbin, reshjet kanë karakterizuar natën me intensitet mesatar deri të lartë, të shoqëruara me furtunë. Deri tani, është raportuar një rast përmbytjeje në Milot, ndërsa punonjësit e emergjencës po monitorojnë situatën. Megjithatë, furnizimi me ujë dhe energji elektrike ka vazhduar normalisht dhe procesi mësimor nuk është ndërprerë.
Në Bashkinë Lezhë, uji ka përmbytur oborret e shkollave “Kosova” dhe “Gjergj Fishta”, duke penguar zhvillimin e mësimit. Lumi Drin ka arritur në nivele kritike, duke kaluar në zonën e rrezikut, dhe shumë toka në zona si Zadrima, Gjadërit dhe të tjera janë të përmbytura. Një familje në Torovicë ka kërkuar ndihmë emergjente pasi uji ka depërtuar 50 cm brenda banesës. Kanalet kryesore janë mbushur në maksimum, dhe punonjësit po punojnë për të larguar ujin nga oborret e shkollave. OSHEE ka raportuar ndërprerje të energjisë në fshatrat Shënkoll, Gajush dhe pjesërisht në Tale.
Në Bashkinë Mirditë, reshjet kanë qenë intensive, por deri tani nuk kanë shkaktuar probleme serioze për banesat. Lumi Zalli Zmesë pranë qytetit është rritur, megjithatë nuk ka rrezik për përmbytje. Disa zona periferike të Rrëshenit po përballen me mungesë energjie.
Hidrovorët po operojnë në kapacitet maksimal për të larguar ujin, ndërsa autoritetet paralajmërojnë se lumenjtë Drin dhe Mat janë në nivele alarmante. Aktualisht, akset rrugore nuk raportohen me probleme të mëdha. Strukturat e emergjencës dhe autoritetet lokale vazhdojnë të monitorojnë situatën dhe këshillojnë qytetarët të tregojnë kujdes në lëvizjet e tyre, si dhe të ndjekin njoftimet zyrtare.
