Princi Harry ka arritur të rikthejë të drejtën për mbrojtje të armatosur nga policia gjatë vizitave të tij në Britani, pas një beteje ligjore disamujore. Një shqyrtim zyrtar e ka konfirmuar atë si të kualifikuar për një skemë sigurie të financuar nga taksapaguesit.
Në maj 2025, Duka i Sussex kishte humbur një çështje gjyqësore që kontestonte vendimin e Komitetit Ekzekutiv Mbretëror për t’i hequr mbrojtjen e financuar nga taksapaguesit pas njoftimit të tij për dorëheqje nga roli si anëtar i lartë i familjes mbretërore.
Princi Harry ka theksuar vazhdimisht se pa mbrojtje të tillë nuk mund ta sillte gruan e tij, Meghan Markle, dhe fëmijët, Princin Archie dhe Princeshën Lilibet, në Britani, për shkak të shqetësimeve për sigurinë e tij. Një incident i fundit, ku një person i panjohur i ishte afruar, e kishte nxitur atë të drejtonte një letër drejtuar Sekretares së Brendshme Britanike, Shabana Mahmud, duke treguar rreziqet e mundshme.
Pas kësaj letre, Ravec, organi nën mbikëqyrjen e Ministrisë së Brendshme, filloi një vlerësim të ri dhe ka arritur në përfundimin se princi plotëson kushtet për mbrojtje zyrtare. Një burim nga mjedisi i Sussex ka bërë të ditur se procedurat për rikthimin e sigurisë së Harry-t janë në proces. Burime në Ministrinë e Brendshme kanë konfirmuar se siguria e tij tashmë është rikonfirmuar.
Sipas udhëzimeve aktuale, Duka duhet të njoftojë Policinë Metropolitane 30 ditë përpara mbërritjes në Mbretërinë e Bashkuar për të aplikuar për leje sigurie, që do të shqyrtohet rast pas rasti. Ky zhvillim i hap rrugën Harry-t për të sjellë fëmijët e tij, të cilët aktualisht jetojnë në Kaliforni, në Britani për të ribashkuar me mbretin Charles.
