Sot në Shkodër zhvillohet gjyqi për katër të arrestuarit, të lidhur me shpërthimin me tritol që rezultoi në vdekjen e Hysni Ymerit disa ditë më parë. Të arrestuarit janë Gerti Bushati, Ergys Ibrahimi, Edison Hasaj dhe Gjergji Zefi.
Ngjarja e rëndë ndodhi më 29 dhjetor në lagjen “Manush Alimani”. Sipas burimeve policore, katër personat e ndaluar dyshohet se kanë vepruar në mënyrë të koordinuar dhe për një shpërblim financiar, duke vendosur dhe aktivizuar lëndën plasëse në panelin elektrik të pallatit ku jetonte viktima 67-vjeçar. Gerti Bushati, njëri nga të arrestuarit, dyshohet se është paguar 1,500 euro për këtë veprim, ndërsa është regjistruar nga kamerat e sigurisë duke kaluar në atë zonë.
Gjatë aksioneve të zhvilluara nga policia, janë sekuestruar prova të shumta që përfshijnë 28 celularë, një automjet “Mercedes-Benz”, rroba të dyshuara të përdorura gjatë ngjarjes, municion, sasi parash në lekë dhe euro, si dhe lëndë narkotike, përfshirë një sasi kokaine. Po ashtu, janë gjetur dhe sekuestruar 3 pajisje GPS për gjurmimin, 2 kamera sigurie dhe një laptop. Policia ngre shpresën se hetimet do të vazhdojnë për të identifikuar persona të tjerë të mundshëm të përfshirë në këtë krim dhe për sqarimin e plotë të motiveve të shpërthimit.
Ky rast tërhoqi vëmendjen e mediave dhe opinionit publik, duke u bërë një nga ngjarjet më të diskutuara të javëve të fundit në vend. Procesi gjyqësor pritet të sjellë më shumë detaje mbi këtë krim të rëndë dhe ndikimin e tij në sigurinë publike në Shkodër.
