Një hetim nga The Guardian ka nxjerrë në pah se përmbledhjet me inteligjencë artificiale të Google, të njohura si AI Overviews, shpesh ofrojnë informacion të pasaktë dhe mashtrues për shëndetin, duke rrezikuar shëndetin e qytetarëve. Këto përmbledhje, që shfaqen në krye të rezultateve të kërkimit, synojnë të japin përgjigje të shpejta dhe të përmbledhura, por ekspertët e shëndetit i paralajmërojnë se ndodhin shpesh keqinterpretime.
Një rast kritik lidhet me kancerin e pankreasit, ku këshillohet shmangia e ushqimeve me yndyrë, një rekomandim i cilësuar si “jashtëzakonisht i rrezikshëm” dhe në antagonizëm me këshillat mjekësore, duke rritur rrezikun e vdekshmërisë. Ndërkaq, janë raportuar informacione të gabuara mbi analizat e gjakut që lidhen me funksionin e mëlçisë, të cilat mund të çojnë pacientët me sëmundje serioze të mendojnë se janë në gjendje të mirë shëndetësore.
Probleme të ngjashme janë evidentuar edhe në informatat për kanceret te gratë, ku përmbledhjet e AI-së kanë ofruar të dhëna “krejtësisht të pasakta”, duke injoruar simptomat reale. Organizatat shëndetësore dhe bamirëse kanë ngritur alarmin, duke theksuar se individët shpesh kërkojnë informacion online në momente ankthi, duke rritur ndjeshëm rrezikun nga gabimet.
Nga ana e saj, Google ka theksuar se shumica dërrmuese e përmbledhjeve janë të sakta dhe të dobishme, duke rindërtuar vazhdimisht cilësinë e informacionit dhe duke ndërhyrë në rast keqinterpretimi. Megjithatë, ekspertët këshillojnë që mbështetja te inteligjenca artificiale për çështje shëndetësore të jetë e kufizuar, duke theksuar nevojën për verifikim nga profesionistë të fushës.
Kjo situatë ka nxjerrë në pah një problem të rëndësishëm: informacioni të dhënë nga inteligjenca artificiale mund të ketë pasoja serioze në shëndetin e individëve. Është thelbësore që çdo informacion i tillë të trajtohet me kujdes dhe të ketë një burim të verifikuar.
