Vajza e aktorit të njohur dhe fitues të çmimit “Oscar”, Tommy Lee Jones, është gjetur e vdekur në një hotel në San Francisko më 1 janar. 34-vjeçarja Victoria Jones u shpall e vdekur në katin e 14-të të hotelit “Fairmont” në orët e para të mëngjesit, pasi një mysafir i hotelit e pa të shtrirë, duke menduar fillimisht se ishte e dehur.
Ekipet mjekësore mbërritën pas njoftimit, rreth orës 02:52, por Victoria u gjet e pavetëdijshme dhe pa shenja jete. Shkaku i vdekjes mbetet i panjohur, dhe autoritetet nuk kanë dhënë detaje zyrtare deri tani. Burime nga hetimi kanë theksuar se nuk janë gjetur shenja dhune apo indikacione që sugjerojnë vetëvrasje, ndërsa hetimet vazhdojnë për të zbardhur rrethanat e ngjarjes.
Victoria Jones kishte pasur eksperienca si aktore në fëmijëri dhe shpesh shoqëronte të atin në ngjarje të rëndësishme kinematografike, përfshirë premiera filmash në New York dhe Los Angeles. Tani, autoritetet pritet të japin informacion shtesë pasi të përfundojë ekzaminimi mjeko-ligjor.
